குண்டூர் சிக்கன் - Guntur Chicken

இந்த சிக்கன் க்ரேவியில் எந்த ஒரு தூள் வகைகளும் பயன்படுத்தாமல், நாமே மசாலாவினை தயாரிப்பதால் கூடுதல் சுவையுடன் அருமையாக இருக்கும்.

திருமதி. ஆசியாவின் குறிப்பில் இருந்து பார்த்து செய்தேன்…நீங்கள் செய்து பார்த்து உங்கள் கருத்தினை தெரிவிக்கவும்.

சமைக்க தேவைப்படும் நேரம் : 20 - 25 நிமிடங்கள்

தேவையான பொருட்கள் :

         சிக்கன் – 1/2 கிலோ

·         இஞ்சி பூண்டு விழுது – 1 மேஜை கரண்டி

·         தயிர் – 2 மேஜை கரண்டி

·         உப்பு – தேவையான அளவு

முதலில் தாளிக்க :

·         எண்ணெய் – 1 மேஜை கரண்டி

·         பட்டை,கிராம்பு, ஏலக்காய்

பொடியாக நறுக்கி கொள்ள :

·         வெங்காயம் – 3

·         தக்காளி – 3

·         கொத்தமல்லி - சிறிதளவு

வறுத்து அரைக்க தேவையான பொருட்கள்:

·         காய்ந்த மிளகாய் – 5

·         தனியா – 1 மேஜை கரண்டி

·         மிளகு – 1 தே.கரண்டி

·         சீரகம் – 2 தே.கரண்டி

·         கடுகு – 1/2 தே.கரண்டி

·         வெந்தயம் – 1/2 தே.கரண்டி

·         காய்ந்த தேங்காய் துறுவல் – 2 மேஜை கரண்டி

செய்முறை :

·         சிக்கனை சுத்தம் செய்து சிறிய துண்டுகளாக வெட்டி கொள்ளவும். வெங்காயம் + தக்காளி + கொத்தமல்லியினை பொடியாக நறுக்கி கொள்ளவும்.

·         வறுத்து அரைக்க கொடுத்துள்ள பொருட்களை ஒவ்வொன்றாக தனி தனியாக வறுத்து சிறிய நேரம் ஆற வைத்து மிக்ஸியில் சிறிது தண்ணீர் சேர்த்து மைய அரைத்து கொள்ளவும்.

·         குக்கரில் எண்ணெய் ஊற்றி தாளிக்க கொடுத்துள்ள பொருட்களை போட்டு தாளித்து கொள்ளவும்.

·         இத்துடன், வெங்காயம் சேர்த்து 1 நிமிடம் நன்றாக வதக்கிய பிறகு, இஞ்சி பூண்டு விழுது சேர்த்து வதக்கவும்.

·         பிறகு, தக்காளியினை சேர்த்து நன்றாக வதக்கவும்.

·         தக்காளி நன்றாக வதங்கியவுடன், வறுத்து அரைத்த விழுது + தயிர் + தேவையான அளவு உப்பு சேர்த்து நன்றாக 2 – 3 நிமிடங்கள் வதக்கவும்.

·         கடைசியில் சிக்கன் + 1 கப் தண்ணீர் சேர்த்து பிரஸர் குக்கரில் 2 – 3 விசில் வரும் வரை வேகவிடவும்.

·         குக்கரில் பிரஸர் அடங்கியதும், குக்கரினை திறந்து கொத்தமல்லி சேர்க்கவும். சுவையான எளிதில் செய்ய கூடிய சிக்கன் க்ரேவி…இதனை சாதம், சப்பாத்தி, நாண், தோசை போன்றவைக்கு சூப்பர் காம்பினேஷன்…

குறிப்பு :

காய்ந்த தேங்காய் துறுவலுக்கு பதிலாக Fresh தேங்காயினை சேர்த்து கொள்ளலாம். அப்படி சேர்ப்பது என்றால், தேங்காயினை வறுக்க தேவையில்லை.

இதனை க்ரேவி மாதிரி செய்து இருக்கின்றேன்…. இத்துடன் 1 கப் தண்ணீர் சேர்க்காமல் செய்தால், கொஞ்சம் dryயாக இருக்கும்…சாதத்திற்கு Side Dishஆக இருக்கும்.

அவரவர் காரத்திற்கு ஏற்றாற் போல, காய்ந்த மிளகாயினை அதிகமாகவே அல்லது குறைத்தோ சேர்த்து கொள்ளவும்.

தயிர் சேர்க்க விரும்பாதவர்கள், அதற்கு பதிலாக எலுமிச்சை சாறு சேர்த்து கொள்ளலாம்.